“Uludüz Ovçuluq Təsərrüfatında ekoloji balans qorunur”- MÜSAHİBƏ

Suallarımıza Uludüz Ovçuluq Təsərrüfatının sahə müfəttişi Rəşaiq Məmmədov cavab verir

· Ovçuluq təsərrüfatları nədir və onların əsas vəzifələri hansılardır?

Cavab: Ovçuluq təsərrüfatları, vəhşi təbiətin qorunması, heyvan növlərinin sayının tənzimlənməsi və ovçuluq fəaliyyəti üçün xüsusi olaraq təşkil olunan ərazilərdir. Uludüz Ovçuluq Təsərrüfatı da bu çərçivədə Şamaxı rayonunun dağətəyi zonasında yerləşir və Respublika əhəmiyyətli təsərrüfatdır. Onun əsas vəzifəsi Dağıstan turu, çöl donuzu, qonur ayı, qırqovul kimi heyvan populyasiyaların artırılması, bərpası və qorunmasının təmin edilməsidir. Uludüz Ovçuluq Təsərrüfatının digər Ovçuluq Təsərrüfatlarından fərqidə odur ki, burada ov fəaliyyəti həyata keçrilmir və yalnız vəhşi təbiətin qorunması təmin edilir.

· Ovçuluq təsərrüfatlarının fəaliyyətinin tənzimlənməsi üçün hansı qanun və qaydalar mövcuddur?

Cavab: Uludüz Ovçuluq Təsərrüfatının fəaliyyəti Azərbaycanın müvafiq qanunvericiliyi əsasında tənzimlənir. Bu qanun və qaydalar heyvan və quş növlərinin qorunmasını, eləcə də ətraf mühitin mühafizəsini, vəhşi heyvanların yarımsərbəst və qeyri-sərbəst şəraitdə saxlanılmasını, yetişdirilməsini və artırılmasını təmin etməkdir. Ovçuluq təsərrüfatından onların məqsədli təyinatına və təbiət komplekslərinin və ayrı-ayrı obyektlərin mühafizəsi, bərpası və istifadəsi üzrə müəyyən edilmiş tələblərə zidd olmayan başqa fəaliyyət növləri həyata keçirilə bilər.

· Ovçuluq təsərrüfatlarının ərazisində hansı heyvan növlərinin qorunması və idarə edilməsi aparılır?

Cavab: Uludüz Ovçuluq Təsərrüfatı, geniş spektrdə müxtəlif heyvan və quş növlərinin məskunlaşdığı bir ərazidir. Burada əsasən cüyür, qaban, ayı, çöl pişiyi kimi heyvan növləri qorunur. Quş növlərindən isə qırqovul, bildirçin, kəklik kimi növlər üstünlük təşkil edir. Bu heyvanlar üçün təsərrüfatda əlverişli təbii şərait mövcuddur. Dağlıq relyefi və bitki örtüyü heyvanların təbii ehtiyaclarını təmin edir, onları vəhşi təbiətdə yaşamağa imkan verir. Təsərrüfatın məqsədi bu növlərin populyasiyalarını qorumaq, artırmaq, mühafizəsini təmin etmək, eyni zamanda ov obyektinə aid edilmiş vəhşi heyvan növlərinin artırılaraq təsərrüfatın relyefinə və iqliminə uyğun digər ovçuluq təsərrüfatlarına paylanmasını təmin etməkdir.

· Ovçuluq təsərrüfatlarının iqtisadi rolu nədir və yerli icmalara hansı faydalar gətirir?

Cavab: Uludüz Ovçuluq Təsərrüfatı, bölgədəki iqtisadi fəaliyyətlərin inkişafında mühüm rol oynayır. Əvvəla, ovçuluq turizmi regiona xarici və yerli turistlərin cəlb edilməsinə şərait yaradır ki, bu da yerli iqtisadiyyat üçün əlavə gəlir mənbəyi deməkdir. Təsərrüfat həmçinin yerli icmalar üçün iş yerləri təmin edir, əhalinin məşğulluq səviyyəsini artırır, həmçinin təsərrüfatdan sağlamlaşdırma, təlim-tərbiyə, ekoloji maarifləndirmə, turizm, istirahət üçün istifadə edilir.

· Ovçuluq təsərrüfatlarında keçirilən tədbirlərin ekoloji təsirləri necə qiymətləndirilir?

Cavab: Uludüz Ovçuluq Təsərrüfatında keçirilən bütün tədbirlər ekoloji balansın qorunması və ətraf mühitin mühafizəsi məqsədilə diqqətlə izlənilir. Dağətəyi tirə-təpəli kolluq əraziləri, burada yaşayan flora və fauna üçün əhəmiyyətli həyat məkanlarıdır. Təsərrüfatın fəaliyyətləri təbiətin bərpasına yönəldilmiş tədbirlər ilə tamamlanır ki, bu da vəhşi təbiətin tarazlığını qorumağa kömək edir. Bununla yanaşı, keçirilən tədbirlərin ətraf mühitə potensial təsirləri əvvəlcədən qiymətləndirilir və zəruri hallarda tədbirlər həyata keçirilir ki, mənfi təsirlərin qarşısı alınsın.

QEYD: Müsahibə Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyələşdirdiyi və “Pragma” Sosial İnkişafa və Ekologiyanın Qorunmasına Dəstək İctimai Birliyi Tərəfindən həyata keçirilən “Ovçuluq təsərrüfatlarına ictimai nəzarətin mexanizmləri” layihəsi çərçivəsində hazırlanıb.