Kiçik və orta biznesin rəqəmsallaşması: Azərbaycanda "Dəstək Proqramı"nın strateji əhəmiyyəti - ŞƏRH

Azərbaycan rəqəmsal iqtisadiyyatın inkişafını sürətləndirmək məqsədilə "Rəqəmsal İqtisadiyyatın İnkişafına Dəstək Proqramı"nın hazırlanması və tətbiqini planlaşdırır. Prezident İlham Əliyevin təsdiqlədiyi 2026-2029-cu illər üçün Strategiyaya əsasən, proqram kiçik və orta biznes subyektləri (KOB) ilə yanaşı iri müəssisələrin də rəqəmsal transformasiya prosesinə qoşulmasını maliyyə və təlim mexanizmləri ilə dəstəkləyəcək. Qrantlar, güzəştli kreditlər və resurslara çıxış imkanlarının genişləndirilməsi vasitəsilə müəssisələrin rəqəmsallaşması sürətlənəcək, məhsuldarlıq və əlavə dəyər artırılacaq.

Beynəlxalq təcrübə göstərir ki, analoji təşəbbüslər iqtisadiyyatın rəqəmsal transformasiyasını praktik nəticələrə çevirə bilir. Məsələn, Sinqapurun "Go Digital" proqramı çərçivəsində 18 min KOB rəqəmsallaşdırılmış və məhsuldarlıq göstəriciləri orta hesabla 3 faiz artmışdır. Bu, göstərir ki, düzgün maliyyə dəstəyi, təlim və texnologiya inteqrasiyası birbaşa əməliyyat səmərəliliyinə və müəssisələrin bazar rəqabətliliyinə təsir edir. Azərbaycanda tətbiq olunacaq model də oxşar şəkildə, müəssisələrin rəqəmsal infrastruktura çıxışını təmin edərək sektor üzrə rəqabət qabiliyyətini gücləndirməyə imkan yaradacaq.

Məqsədli tədbirlərin sayı və miqyası da strateji baxımdan mühümdür. Proqram çərçivəsində azı 10 müəssisənin maliyyə dəstəyi alması, azı 12 müəssisənin rəqəmsal transformasiya üzrə təlim və məsləhət xidmətlərindən yararlanması planlaşdırılır. Bu, yalnız mikroiqtisadi səviyyədə deyil, ümumi qeyri-neft iqtisadiyyatının rəqəmsal komponentlərinin artması baxımından da əhəmiyyətlidir. Qlobal təcrübələr göstərir ki, rəqəmsal transformasiyaya cəlb olunan müəssisələrin sayı birbaşa olaraq sektor məhsuldarlığının və əlavə dəyərin yüksəlməsinə təsir göstərir, eyni zamanda İKT sektorunun ümumi ÜDM-də payının artmasına şərait yaradır.

Proqramın icrası, həm dövlətin iqtisadi siyasəti ilə sinxron, həm də özəl sektorun rəqabətliliyini gücləndirən çevik bir mexanizm kimi çıxış edəcək. Maliyyə dəstəyi ilə birgə təlim və texnoloji tətbiq imkanlarının təmin edilməsi müəssisələrin rəqəmsal biliklərini və əməliyyat səmərəliliyini artıracaq, uzun müddətdə rəqəmsal iqtisadiyyatın qeyri-neft sektoru üzrə payının yüksəlməsinə və ölkədə innovativ biznes mühitinin möhkəmlənməsinə səbəb olacaq.

Aznews.az