“Avroviziya 2026” tarixinin ən böyük boykotu ilə üzləşir

"Eurovision Song Contest" hazırda 70 illik tarixinin ən böyük boykotu ilə üzləşib.

Bu barədə BBC məlumat yayıb.

Nəşrin yazdığına görə, builki müsabiqədə 35 ölkə iştirak etsə də, İspaniya, İrlandiya, Niderland, İslandiya və Sloveniya telekanalları İsrailin yarışmaya buraxılmasına etiraz olaraq tədbirdə iştirakdan imtina ediblər.

Məqalədə qeyd olunur ki, bu qərarların səbəbləri fərqlidir və hər zaman tam aydın deyil.

Bəzi yayımçılar boykotun səbəbi kimi İsrailin Qəzzadakı hərbi əməliyyatlarını göstəriblər. Bildirilir ki, 2023-cü ildə başlayan əməliyyatlar nəticəsində, HƏMAS-ın idarə etdiyi Qəzza Səhiyyə Nazirliyinin məlumatına görə, 72 mindən çox insan həlak olub.

İsrail əməliyyatlara 2023-cü il 7 oktyabrda HƏMAS silahlılarının hücumundan sonra başlayıb. Həmin hücum zamanı təxminən 1200 nəfər öldürülüb, 251 nəfər isə girov götürülüb.

Bəzi telekanallar İsrail hökumətini soyqırımı törətməkdə ittiham edib, lakin İsrail bu ittihamları qəti şəkildə rədd edir.

Nəşr vurğulayır ki, boykot elan edən telekanalların əksəriyyəti öz hökumətlərinin siyasi mövqeyinə uyğun davranır. Bu ölkələrin bəzilərinin hökumətləri İsraili açıq şəkildə tənqid edir.

Ötən ay İspaniya, Sloveniya və İrlandiya siyasətçiləri Avropa İttifaqını İsraillə imtiyazlı ticarət münasibətlərini dayandırmağa çağırsa da, təşəbbüs uğursuz olub.

Bununla yanaşı, telekanallar qərarlarını müstəqil şəkildə qəbul etdiklərini bildiriblər.

"Eurovision Song Contest 2026" ilə bağlı açıqlama verən İsrailin mədəniyyət və idman naziri Miki Zohar boykotu “utancverici və ikiüzlü” adlandırıb.

“‘Avroviziya’ musiqi, mədəniyyət və xalqlar arasında qardaşlıq bayramıdır, siyasi xal toplamaq platforması deyil”, — deyə Miki Zohar bildirib.

Nəşr əlavə edir ki, bəzi yayımçılar İsrailin iştirakı və səsvermə ilə bağlı yaranan mübahisələr səbəbindən yarışmanın artıq real musiqi müsabiqəsi kimi keçirilməsinin mümkün olmadığını düşünür.

Qeyd edək ki, "Eurovision Song Contest 2026"-nın ilk yarımfinalı mayın 12-də keçiriləcək. Proqramı Moldova təmsilçisi açacaq, gecəni isə Serbiya nümayəndəsi yekunlaşdıracaq.

Bukmeykerlərin proqnozlarına görə, favoritlər sırasında Fransa, Yunanıstan və Danimarka təmsilçiləri yer alır.

Mövsüm,

AzNews.az