Elektrik enerjisi istehsalında artım: bərpa olunan mənbələr ön plana çıxır - ŞƏRH

2024-cü ilin ilk altı ayında “AzərEnerji” ASC tərəfindən 12 milyard 323,2 milyon kVt/saat elektrik enerjisi istehsal olunub. Bu göstərici ötən ilin eyni dövrü ilə müqayisədə 404,3 milyon kVt/saat və ya 3,4 faiz artım deməkdir. Energetika Nazirliyinin təqdim etdiyi rəsmi məlumatlara əsasən, istehsalın əksər hissəsi istilik elektrik stansiyalarının (İES) payına düşsə də, hidro və günəş elektrik stansiyalarında da müəyyən artımlar müşahidə edilib. Bununla yanaşı, külək elektrik stansiyalarında azalma baş verib, müstəqil istehsalçılar üzrə isə artım qeydə alınıb.

Aznews.az şərh edir ki, istehsal strukturuna baxıldıqda, enerjinin əsas hissəsi İES-lərdə formalaşıb. Lakin bu göstərici əvvəlki ilə nisbətən bir qədər azalıb. Buna qarşılıq olaraq, su elektrik stansiyalarında 384 milyon kVt/saatlıq artım strateji baxımdan əhəmiyyətlidir, çünki bu, su ehtiyatlarının səmərəli idarə olunmasının və bərpa olunan enerji mənbələrinin dinamik şəkildə sistemə daxil edilməsinin göstəricisidir. Günəş enerjisindəki cüzi artım isə bu sahənin potensialını nəzərə alaraq daha böyük miqyasda inkişaf ehtiyacını ön plana çıxarır.

Külək enerjisi üzrə istehsalın 33 faiz azalması diqqətəlayiqdir. Bu göstərici texniki və ya meteoroloji səbəblərlə izah oluna bilər, lakin eyni zamanda mövcud güclərin səmərəliliyinin və istismar mexanizmlərinin yenidən qiymətləndirilməsinin vacibliyinə işarə edir. Digər tərəfdən, müstəqil istehsalçıların 1 milyard 511,5 milyon kVt/saat elektrik enerjisi istehsal etməsi və burada 8,5 faiz artımın qeydə alınması sektorda özəl təşəbbüslərin fəallaşdığını göstərir.

Ümumilikdə elektrik enerjisi istehsalında müşahidə olunan artım sənaye və sosial ehtiyacların qarşılanmasında infrastrukturun davamlı inkişafı baxımından müsbət tendensiyadır. Lakin enerjinin mənbələr üzrə bölgüsündə daha balanslı strukturun formalaşdırılması, xüsusilə bərpa olunan enerjinin payının artırılması növbəti mərhələdə prioritet məsələ olaraq qalır. Bu yanaşma enerji təhlükəsizliyinin möhkəmləndirilməsi, xarici enerji asılılığının minimuma endirilməsi və iqlim dəyişikliklərinə qarşı dayanıqlı modelin qurulması baxımından əhəmiyyətlidir.

Nuray,

Aznews.az